بسم الله الرحمن الرحيم
ونبدأ مع اول تدوينه عن اكثر موضوع انسأل عنه بالرغم اني تكلمت كثير بالانستقرام
بس هنا راح اسوي مقارنه بين منتجين وبتكلم بشكل مفصل أكثر ..
مزيل الكيوتيكل من نزيه ومزيل الكيوتيكل من سالي هانسن
* الكيوتيكل ( الجلد الميت اللي حول الاظافر ) عن نفسي تقريبا كل اسبوعين ازيله مره وحده فقط
جربت هالنوعين اللي ع اليمين من محل نزيه ( الفروع اللي اعرفها بحياة مول و النخيل مول )
النوع الثاني اللي ع اليسار من سالي هانسن ( ماركة سالي هانسن موجوده بمحلات وجوه وسنتربوينت وصيدلية وايتس )
اللي من نزيه قوامه سائل وخفيف لونه وردي , تعليبه جميل يسهل عليك الاستخدام لكن لانه خفيف يحوسني
اما سالي هانسن قوامه مثل الجل ثقيل شوي وشفاف , تعليبه جدا جميل ولان حجمه صغير فيكون الاستخدام اسهل واريح , نقطه بسيطة على كل ظفر بدون مايحوسني ولا شي
^ اللي فوق سالي هانسن واللي تحت حق نزيه
نجي للحجم مثل ماهو واضح بالصورة اللي من نزيه حجمه يعتبر كبير بالنسبة لسالي هانسن وعندهم اكثر من حجم هذا الوسط
حق نزيه حجمه 300 مل اما سالي هانسن 29.5 مل
السعر اللي من نزيه سعره 13 ريال
سالي هانسن 45 ريال
رأي بالمنتجين , انا فضلت سالي هانسن اكثر من الثاني جدا جدا جميل صحيح السعر والحجم يفرق لكن عادي لانه راح يبقى معك فتره طويلة هذا صار له عندي تقريبا سنه وللحين باقي نصه لاني ماحتاج منه الا شي بسيييط
بالأخير كل المنتجين يؤدون نفس الغرض وكلهم استخدمهم بس استخدامي لسالي هانسن اكثر لاني حبيته جد
ملاحظة اللي بشرتها تتحسس لا تشتري حق سالي هانسن لانه مكتوب عليه هالملاحظة فأنتبهوا
* قبل تبدأين بإزالة الكيوتيكل الافضل تنقعين يدينك بموية دافية مع زيت اللوز الحلو وشوي ليمون
بكذا الجلد الميت يلين وازالته تكون اسهل
الادوات اللي استخدمها بس حاجتين ( اعواد خشب البرتقال + المقص او الاداة الخاصة بإزالة الجلد الميت )
هذي اعواد خشب البرتقال تحصلونها بمحلات ايف روشيه وبرضو وفرتها بمتجري
تستخدمينها بإنك بعد ماتحطين المزيل على الظفر تدفين الجلد على ورا بالجهه اللي كأنها مسطحه
والجهة الثانية بالاول تحطين مزيل تحت الظفر وتستخدمين هالجهه لمنظقة تحت الظفر تطلع لك الجلد الميت بسهوله
^^ بهالصورة اللي فوق تقريبا نفس اعواد خشب البرتقال تطلع مع شنطة البوديكير بس الخشب افضل
والصورة اللي تحت وضحت لكم الطرف الثاني من الاعواد اللي نستخدمه لمنطقة تحت الظفر
اخر خطوة احب استخدم هالأداة لإزالة الجلد الميت
افضلها اكثر من المقص المخصص للإزالة , هذي احسها اسهل وأأمن
المقص اخاف منه هههه
الاداة هذي ماركتها سالي هانسن تجي مع مجموعة البوديكير بمحفظة صغيره
لا تسون فيها بقوه انتبهو وانتم تستخدمونها , الجلد الميت هو اللي يطلع بسهوله وبدون اي الم
اذا حسيتي بألم هذا معناته انك تحمستي ووصلتي للجلد الطبيعي ههه
وبكذا انتهت التدوينه ان شاء الله تكونون استفدتوا منها
